Klieb tal-Pulizija fundamentali biex tinstab droga f'restorant

Nov 12, 2019 15:11
Miktub minn iNews

Raġel ta' 54 sena minn Ħaż-Żabbar li jmexxi restorant f'Wied il-Għajn kien mixli li fl-imsemmi stabbiliment kellu tliet tipi ta' droga.

Patrick Pullicino wieġeb mhux ħati li kellu fil-pussess tiegħu l-kokaina, il-kannabis u l-ecstasy.

Huwn kien mixli wkoll li wettaq dawn ir-reati f'distanza ta' 100 metru minn fejn jiltagħu ż-żgħażagħ, b'ħasil ta' flus u li naqas li jissottometti l-formoli tat-taxxa fuq id-dħul għall-perjodu 2015-2018.

Quddiem il-Maġistrat Gabriella Vella rriżulta li l-pulizija mill-Iskwadra Kontra d-Droga wettqu rejd fir-restorant u wara li sabu ftit fil-bar sabu iktar droga wara s-sink grazzi wkoll għall-klieb li kellhom magħhom.

B'kollox instabu madwar 47 gramma kokaina u 32 gramma kannabis waqt li minn tfittxija f'dar Pullicino nstabu €235,000 fi flus kontanti li għajr għal €28,000 kienu miżmumin f'safe.

Fl-awla kien allegat ukoll li waqt li l-pulizija kienu qed jagħmlu r-rejd fir-restorant marru jħabbtu żewġ persuni biex jixtru d-droga.

Pullicino ngħata l-ħelsien mill-arrest fuq depożitu ta' €5,000, garanzija personali ta' €20,000 u bil-kundizzjoni li jiffirma f'għassa kuljum waqt li kellu l-assi iffriżati.

Il-prosekuzzjoni f'dan il-każ qed titmexxa mill-Ispetturi Justine Grech u Brian Paul Camilleri waqt li l-Avukati Franco Debono u Amadeus Cachia qed jiddefendu lil Pullicino.