Taħriġ għal min jixtieq isib xogħol jew jixtieq xogħol aħjar

Il-Ministru tal-Edukazzjoni u x-Xogħol Dolores Cristina u ċ-Chairperson tal-Korporazzjoni għax-Xogħol u t-Taħriġ, Sandra Sladden dalgħodu nedew il-programm “Enhancing Employability Through Training” li permezz tiegħu aktar minn 8,000 persuna se jingħataw l-opportunità ta’ taħriġ li jgħinhom isibu mpjieg jew itejjbu l-impjieg tagħhom, permezz ta’ programm li l-Korporazzjoni għax-Xogħol u t-Taħriġ se tagħmel b’fondi miksuba mill-Unjoni Ewropea. Dan il-programm se jiswa madwar €3.5 miljun.

Fi stqarrija ntqal li l-Programm “Enhancing Employability Through Training” għandu jkompli jgħin biex il-pajjiż jibqa’ jkollu ħaddiema mħarrġa u kapaċi jaħtfu l-opportunitajiet ta’ mpjieg li rridu nkomplu noħolqu fis-snin li ġejjin.

Meta kienet qed tniedi l-programm il-Ministru Dolores Cristina qalet li l-Gvern dejjem għamel għażliet responsabbli għax jagħraf li biex pajjiżna jegħleb il-maltemp ekonomiku, hemm bżonn ta’ politika soda li tħares b’kontinwità lejn it-taħriġ, l-investiment, il-ħolqien tax-xogħol, il-flessibilità fuq il-post tax-xogħol u s-sostenibilità fix-xogħol.