Jagħlqu n-nomini u għandna l-ewwel kunsill elett

Illejla għalqu n-nomini għall-kandidati tal-elezzjoni ġenerali u dawk tal-kunsill lokali, u sagħtejn wara li għalqu dawn in-nomini nistgħu ngħidu li għandna l-ewwel kunsill lokali elett. Dan għax fuq il-lokalità tal-Imdina kien hemm nomini daqskemm iridu jkunu eletti kandidati. B’hekk dawk kollha li tefgħu n-nomina huma eletti awtomaikament, biex b’hekk il-kunsill se jerġa’ jkun magħmul minn erba’ kunsilliera tal-Partit Nazzjonalista u wieħed tal-Partit Laburista. Filwaqt li l-Partit Laburista dejjem kellu kandidatura limitata ħafna fuq din il-lokalità, il-Partit Nazzjonalista kien ikollu iktar kandidati u għalhekk kważi dejjem saret elezzjoni.

Intant, il-kunsilliera fl-Imdina issa huma Jane Attard, Joseph Debono, Peter Joseph Dei Conti Sant Manduca u Camilla Scerri f’isem il-Partit Nazzjonalista u Frederick Azzopardi f’isem il-Partit Laburista. Issa l-Kunsill irid jagħżel Sindku, b’indikazzjoni mid-Dar Ċentrali tal-Partit Nazzjonalista juru li se jerġa’ jkun Dei Conti Sant Manduca li jokkupa din il-kariga għas-snin li ġejjin. Fuq din il-lokalità kien hemm 241 persuna eleġibbli li jivvotaw.