Il-każ ta’ Silvio Zammit differit għal darb’oħra

Il-kumpilazzjoni fil-konfront ta’ Silvio Zammit ta’ 48 sena minn Tas-Sliema, li huwa mixli b’tixħim, mhix se tkompli għada, iżda se tkompli tinstema fl-14 ta’ Marzu ġej, wara talba mill-Prosekuzzjoni.

Din hija t-tieni darba li s-seduta ġiet differita fuq talba tal-Prosekuzzjoni, wara rikors li ressqet illum.

L-Assistent Kummissarju Michael Cassar u l-Ispettur Angelo Gafa, li qed imexxu l-Prosekuzzjoni f’dan il-każ għamlu din it-talba għax għadhom għaddejjin l-investigazzjonijiet b’rabta ma’ dan il-każ.

Silvio Zammit jinsab mixli li talab €60 miljun minn għand il-kumpanija Svediża Swedish Match biex jinfluwenza d-direttiva Ewropea dwar it-tabakk, ħalli t-tabakk Snus, li ma jagħmilx duħħan, ikun jista' jinbiegħ fil-pajjiżi tal-Unjoni Ewropea peress li s’issa dan jista’ jinbiegħ biss fl-Isvezja.

Dan il-każ ġie investigat u eventwalment wassal għar-riżenja ta’ John Dalli.

L-Avukati Kris Busietta u Edward Gatt qed jidhru għal Zammit.