It-temi soċjo edukattivi minn dejjem kienu fuq nett tal-aġenda tagħha. Illum, anke jekk m’għadiex taħdem fit-taqsima tal-aħbarijiet, għadha tagħtihom importanza fil-programmi tagħha. Simone Cini temmen li l-edukazzjoni hija ċ-ċavetta taċ-ċiviltà u l-uniku mezz kif tista’ ssolvi ħafna mill-problemi soċjali li jirrenjaw fil-pajjiż. Għandha għal qalbha wkoll is-suġġetti tan-nutriment u s-saħħa, għax temmen li s-saħħa tmur id f’id mal-edukazzjoni. Id-drittijiet tal-annimali hija tema oħra li mingħand Simone nistennew ħafna kontribuzzjonijiet dwarha.

Żmien l-eżamijiet

Min jaf kemm minnkom il-politika ħierġa minn widnejkom u ma tifilħux tisimgħu imqar il-kelma. Nifimkom. Bħalissa l-politikanti għaddejjin minn eżami iżda ma rridux ninsew li anke uliedna se jkunu għaddejjin mill-eżamijiet dalwaqt. L-eżamijiet. Uff xi dwejjaq naffaċċjawhom żgħar u meta nikbru nerġgħu ngħaddu minnhom ma uliedna… min għal darba, tnejn, tlieta u anke aktar!

Dalgħodu kont qed nitkellem ma xi ħbieb tiegħi li t-tfal tagħhom qegħdin fl-aħħar sena tal-iskola sekondarja. Bħalissa uliedhom se jibdew il-‘mocks’. Kollha jgħiduli bil-ġiri ma Malta għall-privatijiet. Uħud minn dawn il-ġenituri għandhom tfal jattendu skejjel indipendenti fejn ta’ kull sena joħorġu mas-sitt elef ewro miżati tal-iskola. Minkejja dan, anke huma qaluli li t-tfal jibatuhom privat kważi tas-suġġetti kollha.

Dan il-fenomenu tal-privatijiet kemm-il darba ddiskutejtu ma’ Professuri universitarji fil-qasam tal-edukazzjoni u dawn dejjem aċċertawni li t-tfal m’għandhomx għalfejn imorru privat jekk isegwu l-lezzjonijiet l-iskola. Nibqa’ msaħħra u mistagħġba kif allura l-maġġoranza tan-nies li naf jibagħtu l-uliedhom għall-privat xorta waħda.

Dawn il-professuri qed ikunu realistiċi? Dawn il-ġenituri jemmnu li uliedhom għandhom bżonn lezzjonijiet apparti dawk tal-iskola? jew inkella kulħadd qed jirraġuna li la Ċikka u Peppa qed jibagħtu ‘l tagħhom… mela allura huma għax le?

Dawn l-għalliema kollha gradwati u kkwalifikati qed ilaħħqu s-sillabu biex b’hekk l-istudenti tagħhom ma jkollox bżonn għalliema oħra fl-istess suġġett? Saħansitra smajt b’każijiet li jdarrsuni fejn l-għalliem ta’ suġġett fi skola indipenedenti qal lill-ġenituri li t-tfal għandhom bżonn privat għaliex is-sillabus ma kienx se jintlaħaq l-iskola… u oħroġ il-għaġeb… il-privat jagħtih l-istess għalliem!

L-aktar li huma konfużi dwar dan il-fenomenu huma l-ġenituri. Faċli ngħid li bosta minnhom jagħmlu bħal ġar tagħhom għax meta jkollok it-tfal ma tkun trid tonqoshom minn xejn. Iżda fil-verità din id-dipendenza kollha fuq lezzjonijiet apparti l-iskola tista’ tagħmel aktar ħsara milli ġid. Grupp ta’ għalliema kienu qed jgħiduli li jafu bi tfal li jitgħażżnu l-iskola għax iserrħu rashom bil-lezzjonijiet tal-privat. Dawn it-tfal jaħsbu li l-flus huma gelgul ħiereġ u ma jaqta’ qatt. Din il-filosofija xejn tajba se tkun il-bazi tas-soċjetà tagħna għada ħbieb. Naħsbuha sew!

1