Malta fl-UE, id-drittijiet ċivili u t-tisħiħ tal-batut fis-soċjetà huma t-temi li l-iktar jinteressawh. Qatt ma ddejjaq jgħid dak li jemmen fih u jqis il-kitba onlajn bħala l-aqwa għodda biex twassal messaġġ. Cyrus Engerer beda l-involviment tiegħu fil-politika fil-kampanja referendarja dwar l-UE, kien Viċi-Sindku f’Tas-Sliema u flimkien ma' oħrajn kien parti mill-kampanja favur il-liġi tad-divorzju. Illum attiv fil-Partit Laburista u l-Fondazzjoni IDEAT. Interessat fil-politika, komunikazzjoni, social-media, arti u kultura.

Iktar flus f’butek

Il-proposti tal-Partit Laburista dwar l-enerġija huma mmirati biex kull individwu, familja u negozju jkollhom iktar flus fil-but. Dan iwassal biex tikber l-ekonomija u jinħolqu iktar impjiegi.

Minkejja r-roħs fil-kontijiet, Gvern ġdid jidher li hu kommess li jibqa’ jiġġieled il-ħela. Il-miżuri progressivi imħabbra, jwasslu lil kulħadd biex joqgħod attent mill-ħela. Inqas ma taħli elettriku, iktar tgawdi minn roħs fil-kont tiegħek.

Lejn gvern serju

FL-opinjoni tiegħi l-iktar fatt importanti li ħareġ mill-proposti elettoral żvelati l-bieraħ, ma kienux li t-tariffi tad-dawl u l-ilma se jorħsu biss. Kien ta’ sodisfazzjon għalija, u konvint li għal ħafna oħrajn, li jidher li jista’ jkollna Gvern serju fil-futur.

It-tmexxija ta’ Joseph Muscat ma marritx quddiem il-ġurnalisti biex tfajjar porposti bl-addoċċ li kienu jdoqqu għal widnejn kulħadd. Għamlet ir-riċerka, ikkonfermata ma’ esperti barranin, li l-Gvern ta’ GonziPN ukoll ikkonsulta ta’ spiss magħhom, u għażlu l-aqwa pjan fiċ-ċirkostanzi tal-pajjiż.

Ir-roadmap dwar l-enerġija ma ħaristx biss lejn ir-roħs fil-kontijiet iżda se tibda tindirizza d-dejn tal-Enemalta, li GonziPN żied għal ‘l fuq minn € 800 miljun; se tkun qed issebbaħ id-Delimara u l-lokalità ta’ Marsaxlokk; se ġġib investiment minn kumpaniji privati ta’ €300 miljun; u se tassigura arja iktar nadifa għalina lkoll.

Joseph – Malta li Rrid Ngħix Fiha

Ingħatajt l-opportunità biex nikteb ktieb bil-ħsibijiet ta’ Joseph Muscat. Waqt il-kitba ġejt ispirat mid-diskors ta’ Joseph fil-Konferenza Ġenerali Annwali tal-2012 meta tkellem dwar il-ħsibijiet tiegħu għal Malta u qal ‘din hi Malta li noħlom dwarha’, ‘din hi Malta li rrid ngħix fiha’.

F’dan il-ktieb wieħed jista’ jaqra dwar kif il-mexxej tal-Partit Laburista fforma l-fehmiet bażiċi tiegħu li wassluh biex jidħol fil-politika u jbiddel il-Partit Laburista għal dak li hu llum.  Meta wieħed jara l-mixja ta’ ħajjet Joseph, jirealizza għalfejn wasal għall-għajta ta’ ‘Malta Tagħna Lkoll’.

2