“Vandaliżmu tas-siġar bil-permess” – FAA

Flimkien Għal Ambjent Aħjar (FAA) qalet fi stqarrija li hija mħassba ħafna dwar il-pjan li jitneħħew 38 siġra mix-xatt tal-Isla. L-FAA qalet li dan it-tħassi jikber wara li diġà nqerdu għadd ta’ siġar quddiem is-Santwarju tal-Mellieħa u d-deċiżjoni li se jinqalgħu wkoll siġar f’Kennedy Grove u quddiem il-lukanda Phoenicia, il-Belt.  

L-FAA qalet li filwaqt li tappoġġja t-tisbieħ fi tliet ibliet tal-Kottonera, l-FAA qalet li dawn is-siġar għandhom 56 sena u huma fost l-eqdem fl-Isla. L-FAA għamlet referenza għal dak li qal kelliem għal Grand Habrour Regeneration Corporation meta semma kif l-għeruq ta’ dan is-siġar jistgħu jagħmlu ħsara lill-pavimentar li se jsir. L-FAA qalet li din mhix raġuni ġustifikabli għat-“tbiċċir” ta’ iktar siġar għax stħarriġ tal-Korporazzjoni tal-Ilma juri kif l-għeruq mhumiex iħallu ħsara fil-post li kien deskritt bħala l-uniku post miftuħ li baqagħlhom in-nies tal-Isla.