Robert Musumeci u Simone Cini minflok Joe Grima

inewsmalta.com jista’ jiżvela li l-eks Sindku u eks kandidat tal-Partit Nazzjonalista, Robert Musumeci, se jkun wieħed miż-żewġ preżentaturi tal-programm ta’ nhar ta’ Tnejn filgħaxija fuq ONE Television. Jirriżulta li miegħu fit-tmexxija ta’ dan il-programm se jkun hemm il-ġurnalista ta’ esperjenza Simon Cini. Dan seħħ wara li fl-aħħar ġimgħat irriżenja mit-tmexxija ta’ dan il-programm, Joe Grima.

Ikkuntatjat minn inewsmalta.com, il-Perit Robert Musumeci kkonferma l-aħbar. Qal li hu kien qiegħed jaċċetta “din l-opportunità” filwaqt li ta idea ta’ x’wieħed jistenna mill-programm. “Il-programm mhux intiż li jiġri wara l-istorja, iżda huwa intiż li jiġri wara s-sustanza politika. Jiena m’iniex ġurnalist, iżda nemmen li permezz tal-midja tista’ tinfluwenza l-kwadru politiku,” qal Musumeci.

Jingħad li fil-passat Musumeci kien diġà offrut programm ta’ analiżi politika fuq l-istess stazzjon. Il-Perit Musumeci kien elett Sindku għal tliet darbiet fis-Siġġiewi, fejn f’isem il-Partit Nazzjonalsita dejjem kiseb ammont sostanzjali ta’ voti. Minkejja dan fl-aħħar xhur iddikjara li huwa kien informa lid-diriġenti tal-Partit Nazzjonalista li ma kienx se jibqa’ kandidat, la għall-kunsill u lanqas għall-elezzjoni ġenerali. Għal dan hu qatt ma ta raġuni uffiċjali.

Musumeci huwa magħruf ukoll għall-pożizzjonijiet liberali tiegħu filwaqt li kontinwament jitkellem kontra kampanji negattivi u attakki personali.

Għal xi żmien anke Musumeci nnifsu spiċċa fil-mira ta’ ċertu attakki, fejn fost oħrajn kien suġġett ewlieni fuq il-blog ta’ Daphne Caruana Galizia għal diversi xhur.

Minkejja dan, b’mod konsistenti, Musumeci jibqa’ jagħti x’jifhem lill-pubbliku li m’hemmx differenza bejnu u bejn il-Partit Nazzjonalista. Fil-PN hemm min jemmen li ċerti attakki fuq Musumeci kienu maħsuba biex hu jwarrab bil-kwiet u b’hekk tinfetaħ it-triq biex Karol Aquilina, magħruf kemm hu qrib ta’ Richard Cachia Caruana u Gordon Pisani, isir Sindku tas-Siġġiewi.

Ma kienx l-ewwel darba li fil-pubbliku, Aquilina u Musumeci ħadu pożizzjonijiet kuntrastanti. Fosthom kien hemm il-pożizzjoni li Musumeci kien ħa fil-kwistjoni tal-każin Laburista tas-Siġġiewi. Għall-mistoqsija ovvja dwar x’pożizzjoni se jkun qiegħed jieħu f’dan il-programm huwa wieġeb li: “dan il-programm għandu jservi biex jesponi l-aspetattivi attwali tas-soċjetà u kif il-politiċi se jwieġbu għal dan fil-leġislatura li jmiss tenut kont tar-realtajiet li jiċċirkondaw lill-pajjiżna.” 

34