Aġġornat: Imut b'xokk waqt użu ta' 'chaser'

John Pisani   |  20:51  |  28.08.2012

Elton John Cini ta’ 36 sena miż-Żurrieq tilef ħajtu kawża ta’ xokk elettriku meta kien qed jaħdem fil-kunvent tas-sorijiet fl-Imrieħel.

Għall-ħabta tas-18.20 Cini kien qed juża ċ-chaser, magħrufa aħjar bħala ‘fekruna’, biex jagħmel trinka fil-ħajt. Huwa kien qed jagħmel xi xogħol fil-kunvent tas-sorijiet li jinsab fi Triq Notabile fl-Imrieħel, limiti ta’ Birkirkara. Kif kien qed iħaffer jidher li laqat wajer tal-elettriku li minnu kien għaddej il-kurrent b’konsegwenza li Cini ħa xokk u tisbita kbira. 

L-ewwel għajnuna bdiet tingħatalu minn kollegi tiegħu u nies oħra li kienu fil-kunvent. Dan sakemm waslet ambulanza b’żewġ infermieri u tabib. Dawn komplew jagħtuh il-messaġġi u peress li qalbu ma kinitx qed tħabbat tawh ukoll xokkijiet. Dan l-intervent tkompla fl-ambulanza fi triqtu lejn l-Isptar Mater Dei. Anke hawn it-tobba, fosthom Michael Spiteri, komplew jipprovaw minn kollox u reġgħu amminstraw ix-xokkijiet fuq qalbu b’tentattiv li din terġa’ tibda’ tħabbat, iżda l-intervent iddisprat tat-tim mediku kien għalxejn għax Cini miet fl-emerġenza.

B’din it-traġedja ġie informat il-Maġistrat Carol Peralta li ordna inkjesta u ħatar l-esperti tal-Qorti, fosthom it-Tabib Forensiku Mario Scerri. Il-Pulizija għadha qed tinvestiga din il-fatalità.

(Ritratt: John Pisani) 

 

kummenti
1
 
(imla l-kaxxi kollha)
Isem
Imejl
Telefon
Kumment

unkown

   Wed 29-Aug-2012, 08:03

Bniedem b mewta sfortunata,j`alla lbambin isabbar lil familtu u jitfa jdejh fuqom.. RIP habib..