William mistenni jintbagħat il-ħabs wara għaxar snin 'il bogħod mill-vizzju

Nov 27, 2017 16:19
Miktub minn Charles Miceli

SOĊJETÀ KATTIVA

Anzi. Mhux biss kattiva, imma vendikattiva. U meta nitkellem dwar soċjetà tajjeb ngħid li qed nitkellem dwari, dwarek, dwar it-tabib, dwar l-avukat, dwar l-arċipriet u dwar l-onorevoli. Dwarna lkoll.

Soċjetà li minkejja kollox għadha titlob il-pound of flesh. L-għajn għal għajn u s-sinna għal sinna. Imbagħad, adding insult to injury, tipprova tippreżenta lilha nnifisha bhala soċjetà ħanina.

Qed nikteb b’ħafna rabja. Rabja li ħakkmitni xhin smajt li sieħbi William se jintbagħat il-ħabs. Iva l-ħabs. U aktarx li filwaqt li aħna se nkunu komdi fil-jiem tal-Milied imdawrin mill-għeziez tagħna, William se jkun waħdu f’ċella kiesħa.

MIN HU WILLIAM?

Lil William Agius iltqajt miegħu l-ewwel darba fil-Komunità Terapewtika ta’ San Blas. Naħseb kienet is-sena 2005 imma m’iniex ċert. Żagħżugħ simpatiklu, intelligenti, enerġetiku u deċiz li jbiddel ħajtu.

Kif qal huwa stess fuq programm televiziv lokali, William beda d-droga meta kellu 14-il sena. U bħall-maġġoranza ta’ dawk li jinqabdu f’din in-nassa, spiċċa jbigħ biex isostni l-vizzju.

Ħazin. Ħafna ħażin. Għax il-ħazin ma tistax tgħidlu tajjeb. U jekk trid tkun onest miegħek innifsek ma jifdallekx triq oħra ħlief li tikkundannah.

10 SNIN WARA

Imma mbagħad mill-banda l-oħra lanqas tista’ tibgħat bniedem il-ħabs 10 snin wara li int stess tkun infaqt ma nafx kemm flus u qlajt saħħtek biex tirriabilitah.

Tal-biki. U tiskorragixxi mhux biss lill-membri tal-istaff li jahdmu b’entużjasmu biex jgħinu lil dawn iż-żgħazagħ, imma wkoll lil dawk maqbudin fil-vizzju. għax jgħidulek għalfejn se nagħmel tant sagrifiċċji biex xorta wahda nispiċċa l-ħabs.

M’iniex nagħti tort lill-Qorti għax naf li hafna drabi l-Imhallfin u l-Maġistrati jkollhom idejhom marbutin bil-liġijiet. Imma xi ħaġa trid issir.

MHUX BISS KATTIVA... IMMA MIĠNUNA

Is-soċjetà mhux biss kattiva imma miġnuna wkoll. U bil-provi. Wara 10 snin li William għamel il-programm tal-Caritas u reġa’ sab postu fis-soċjetà, issa se nibagħtuh fil-Faċilità Korrettiva ta’ Kordin biex ngħinuh jikkoreġi ruħu. Tad-daħk kieku ma kinitx tal-biki.

Is-sabiħa hija li aktarx li l-awtoritajiet jibzżħu joħorgu għonqhom biex jagħtu maħfra lil William ħalli jeħilsuh minn din il-kattiverija. U aktar li ħadd mhu se jorganizza protesti fit-toroq biex William ma jmurx il-ħabs.

Fuq kollox aktarx li jien u int sal-Milied inkunu nsejna li William qiegħed il-ħabs.

Mulej aħfrilna għax ma nafux x’aħna nagħmlu.