Il-Ħinijiet tal-Ħwienet

Jan 13, 2017 15:24
Miktub minn Benny Borg Bonello

Din il-ġimgħa tħabbar li l-ħinijiet tal-ħwienet ġew liberalizzati ftit aktar. Dan għaliex il-ħwienet saru jistgħu jiftħu l-Ħadd mingħajr ma jkollhom bżonn jieħdu permess jew iħallsu basta jkunu magħluqa ġurnata oħra.

Pass ‘il quddiem, biss xorta għad hemm restrizzjonijiet għaliex il-ħinijiet fost il-ġimgħa ġew estiżi l-Hamis,il-Ġimgħa u s-Sibt. Dawn ġew estiżi sal-10pm f’dawn il-ġranet biss.

Meta tħabbru dawn il-ħinijiet il-President tal-GRTU ġie irrappurtat li qal li l-GRTU taqbel perfettament ma’ dak li ġie propost. Ma hemm xejn tal-iskantament f’dan għaliex il-Gvern għamel preciż bħal ma riedet il-GRTU.

Li hemm tal-iskantament hu li l-GRTU ħadet 15-il sena biex tasal s’hawn. Jien niftakar l-oppożizzjoni li kienet saret mill-GRTU 15-il sena ilu kif kienet ħaditha qatta bla ħabel meta Bay Street fetaħ il-Ħadd. Ma kienx hemm argument li ma użatx biex ma tħallix dan isir. Sal-Knisja ppruvat tuża biex ma tħallix lil dawk li riedu jiftħu l-ħanut tagħhom il-Ħadd u jużaw l-investiment li jkunu għamlu b’aħjar mod li jaħsbu li hu l-aħjar. Niftakar li kien ukoll użat l-argument tal-ħaddiema li dawn ser jiġu sfruttati billi jiġu mġiegħla jaħdmu bla waqfien.

Dawn ir-restrizzjonijiet ma kinux biss ħżiena għal tal-ħanut, iżda wkoll għall-konsumaturi.

Wara 15-il sena waslet s’hawn. Għamilna pass. Biss xorta s-sidien tal-ħwienet ma jistgħux jaħdmu kemm iridu f’liema ħinijiet li jaħsbu li hu l-aħjar għalihom u f’dawk il-ħinijiet li huma tajba għall-konsumaturi.

Enerġija

Ġeneralment dan hu suġġett li ftit jinteressa lin-nies sakemm il-prezz ma jogħlix. Dan għaliex l-enerġija, f’forom differenti, tant saret parti waħda mal-ħajja tagħna li ftit nistgħu nimmaġinaw kif nistgħu ngħaddu mingħajrha. L-aktar li naraw dan hu speċjalment meta jkollna ġranet kiesħa bħal dawn li għaddejjin minnhom bħalissa. Biss tajjeb li nkunu nafu x’inhu għaddej għaliex l-interessi tagħna bħala konsumaturi dejjem jistgħu jintlaqtu.

Fl-aħħar ta’ Novembru, l-Kummissjoni Ewropea ipproponiet li twaqqaf kumitat li jkun immexxi mid-distributuri tal-enerġija biex jagħmel regolamenti u jara li d-distributuri jimxu magħhom. L-iskop ta’ dan hu suppost hu li jkun hemm a fair deal għall-konsumaturi, ikun hemm effiċjenza u l-Ewropa tkun mexxej importanti speċjalment fil-qasam ta’ sorsi oħra ta’ enerġija.

L-iskop jidher nobbli. Biss il-mekkaniżmu hu kkritikat ħafna għaliex l-istruttura amministrattiva li qed tiġi proposta barra li ser tkun komposta minn distributuri biss, ser ikollha l-poteri li tagħmel ir-regolamenti u tara li dawn ir-regolamenti jiġu osservati. Bil-Malti dan il-kumitat ser ikollu l-poteri ta’ leġiżlatur, ta’ regolatur u ta’ qorti. Kulħadd jaf li biex tassigura trasparenza u kontabilita’ ma jistax ikollok lil xi ħadd li jkollu dawn il-poteri f’xi qasam. Biss sfortunatament dan hu li qed jiġi propost.

Hu tajjeb li r-rappreżentanti tagħna sew fil-Parlament Ewropew u anki d-distributuri tagħna jaraw li dan ma jiġrix. Illum kulħadd jaf li l-industrija fl-UE għandha influwenza kbira. Fil-fatt hu għalhekk li hemm pressjoni kbira biex l-UE tara li l-Kummissarji tagħha jkunu indipendenti. Sfortunatament dan ma tantx narawh għaliex ħafna Kummissarji wara li jtemmu l-ħatra tagħhom jispiċċaw f’bordijiet ta’ kumpaniji fl-istess settur li huma suppost kienu qed jikkontrollaw. Hemm ħafna li juru tħassib dwar dan. Il-fatt li din il-Kummissjoni ma għamlet xejn dwar il-każ ta’ Jose’ Manuel Barosso, li kien il-President tal-Kummissjoni u li spiċċa Chairman ta’ Goldman Sachs, kumpanija li hi waħda mill-kbar nett fil-qasam finanzjarju juri n-nuqqas ta’ rieda mill-Kummissjoni preżenti biex tnaqqas l-influwenza tal-industrija.

Biss nerġgħu niġu għall-enerġija. S’issa l-politika riċenti li qed jimxi l-Gvern biha hi ta’ stabilita’ tal-prezzijiet tal-enerġija. Din hi politika li konsumaturi madwar l-Ewropa kollha jixtiequ. Il-politika Ewropea sfortunatament temmen li l-konsumatur darba fix-xahar għandu joqgħod bilqegħda u jara l-prezzijiet ta’ dawk li jbiegħu l-enerġija biex fil-każ jibdel id-distributur u hekk jiffranka. Biss, u dan japplika wkoll għas-suq tal-enerġija Ingliż li hu l-aktar wieħed sofistikat fl-Ewropa, il-konsumaturi la għandhom il-ħin, la l-interess u wisq anqas l-abbilta’ u l-mezzi biex jagħmlu dan. F’ħafna mill-konferenzi li attendejt il-gruppi ta’ dawk li jaħdmu viċin tal-konsumaturi dejjem sostnew dan.

Hu għalhekk li r-rappreżentanti tagħna jridu joqogħdu attenti għaliex din l-istruttura jista’ jkollha impatt qawwi negattiv fuq din il-politika.