Twissija

  • Aww 26, 2012 14:34
  • Miktub minn

    Suppost indipendenti, il-Bank Ċentrali ta’ Malta hu mmexxi min-nies li huma Nazzjonalisti dikjarati, b’eks-ministru Nazzjonalista tal-ekonomija bħala l-Gvernatur. Għalhekk twissija li dehret fl-aħħar rapport ta’ kull tliet xhur maħruġ mill-Bank fiha x’tomgħod. Skont il-Bank, il-gvern irid jaħseb għal aktar miżuri ta’ “konsolidament fiskali” – jiġifieri jnaqqas aktar mill-ispiża tiegħu, wara li diġà qasqas xi €40 miljun ewro fuq kmand tal-Kummissjoni Ewropea.

    Il-BĊ jqis li l-ispiża tal-gvern qed tiżdied wisq waqt li t-tkabbir ekonomiku qed jogħtor – u dan skont ir-riżultati tal-ewwel tliet xhur ta’ dis-sena. Fit-tieni tliet xhur jidher li l-perspettiva kompliet “teħżien”. Imma ninsabu lejliet elezzjoni. Il-gvern hu mdorri jroxx il-flus bl-addoċċ fix-xhur ta’ qabilha biex jakkwista l-voti.

    Il-Bank Ċentrali hu mdejjaq għax il-gvern se jirrokka kontra r-regoli taż-żona ewro u l-wegħdi li għamel lill-Kummissjoni Ewropea. Lili aktar idejjaqni l-fatt li qed joħorġu fil-beraħ il-problemi strutturali fl-ekonomija ħtija tal-fatt li ma investejniex biżżejjed matul is-snin. Il-magna produttiva tagħna mhix mifruxa daqs ta’ ħaddieħor. F’ċerti oqsma hi dgħajfa jew antikwata.

    Turiżmu

    Qasam li jeħtieġlu aktar attenzjoni u anqas kompjaċenza milli qed jingħata hu t-turiżmu. Għaddejjin bidliet kbar fil-mod kif jinħadem it-turizmu internazzjonali u ma jidhirx li għandna kuxjenza strateġika dwar kif se ngħaqqdu l-forzi kollha f’dan il-qasam biex nippożizzjonaw ruħna mill-aħjar li nistgħu. Nikkonslaw għax minn sena għall-oħra ċ-ċifri tat-turisti li jżuruna jkunu tajba jew kważi tajba, waqt li l-Air Malta tagħmel minn kollox biex ma tikkraxxjax. Il-lukandiera jżommu fil-wiċċ billi jnaqqsu l-prezzijiet u l-ispejjeż, ħaġa li żgur tirrifletti fuq il-kwalità. Sadattant partijiet mill-infrastruttura li jservu wkoll għas-sostenn tat-turizmu, bħat-trasport pubbliku, l-indafa fit-toroq u t-telefon għal barra, xejn mhuma jkunu ta’ għajnuna.

    Ftakar

    “Ftakar” hu CD interessanti ħafna imtella’ mill-grupp The Big Band Brothers li jippreżentaw fuq stil modern, kanzunetti Maltin tas-snin sittin sal-bidu tat-tmeninijiet. Il-Big Band Brothers għandhom eleganza u briju li ma bħalhom. Żgur iqanqlu nostalġija qalb dawk li jiftakru l-interpretazzjonijiet oriġinali. Fost l-ismijiet ta’ awturi, mużiċisti u interpreti li xogħlijiethom jingħataw ħajja ġdida fi “Ftakar” hemm Carmelo Zammit, Albert Cassola, Joe Grech, Ġorġ Zammit, Paul Abela, Charles Camilleri, Joe Friggieri, Raymond Mahoney u Ray Agius. Laqatni l-aktar isem Alfred C. Sant. Snin ilu konna skużajna ruħna ma’ xulxin għax in-nies tħawwadna wieħed ma’ l-ieħor peress li għandna l-istess isem. Jien ma kontx niddejjaq jaħsbuni kapaċi nikteb kanzunetti bħal tiegħu; aktar nissuspetta li kellu problemi hu, jaħsbuh jien. Insellimlu.

    alfredsant.org

    Simili

  • Agħżel storja li tixtieq tikkummenta dwarha u agħfas fuq il-ħolqa "ikkummenta" li tinsab taħt l-artiklu.

    Wara dan tinfetaħlek tieqa fejn tintalab tirreġistra. Agħfas fuq "irreġistra" u imla d-dettalji kif mitlub. Importanti li kull dettall imdaħħal ikun korrett. Minkejja li tintalab timla indirizz tal-imejl li huwa eżistenti u mhux fittizju, inti xorta tista' tikkummenta b'mod anonimu.

    Wara li tibgħat id-dettalji tiegħek, se tirċievi imejl fuq l-indirizz li rreġistrajt bih. F'din l-imejl se tirċievi security code.

    Ikkupjah u daħħlu fit-tieqa tar-reġistrazzjoni. Din hija proĊedura li ssir darba.

    Minn hemm 'il quddiem tkun tista' tikkummenta fuq kull artiklu bin-nom-de-plume tal-għaໝla tiegħek. Jekk issib xi diffikultà tiddejjaq xejn tikkuntattjana fuq 2590 0288.

Kummenti: 0