Il-President Bolivjan Evo Morales qal li se jkun qed isejjaħ elezzjonijiet mill-ġdid

• Nov 10, 2019 15:39
• Miktub minn iNews

Il-President Bolivjan Evo Morales qal li se jkun qed isejjaħ elezzjonijiet ġodda wara li l-Organizzazzjoni għall-Istati Amerikani (OAS) qalet li l-vot li ttieħed ix-xahar li għadda għandu jkun annullat minħabba irregolaritajiet.

F’konferenza tal-aħbarijiet illum, Morales qal li se jkun jibdel il-membri tal-bord elettorali li sfaw fil-mira ta’ kritika ħarxa wara l-allegat involviment tagħhom ta’ frodi elettorali b’rabta mal-vot elettorali tal-20 ta’ Ottubru li għadda.

“Fis-sigħat li ġejjin, bi qbil mal-forzi politiċi kollha, se jkunu qed nistabbilixxu dan,” huwa saħaq.

Il-kummenti ta’ Morales waslu ftit wara li l-OAS, f’rapport preliminari, qalet li ma tistax tivverifika r-riżultat wara manipulazzjoni ċari li kien hemm.

L-OAS żiedet tgħid li aktarx li Morales ma kisibx il-maġġoranza ta’ 10% fil-voti miksubin biex jirbaħ l-ewwel rawnd tal-elezzjoni, u rrakkomandat li l-Bolivja tagħmel użu minn awtoritajiet elettorali ġodda f’elezzjoni ġdida.

Morales kien imħabbar bħala r-rebbieħ tal-elezzjoni ta’ Ottubu li għadda b’vantaġġ ta’ 10% fuq ir-rival ewlieni tiegħu, Carlos Mesa, biex b’hekk rebaħ il-Presidenza fl-ewwel rawnd. Madankollu waqfien ta’ kważi 24 siegħa fl-għadd tal-voti wassal għal akkużi ta’ frodi u protesti, strajks u roadblocks.

Simili

• 

  Ħaddiem rapportat nieqes wara li jiżviluppaw nirien fuq l-uniku aircraft carrier Russu

• 

  Boris Johnson mistenni jikseb maġġoranza ta' 28 siġġu

• 

  In-numru tal-vittmi tal-iżbroff tal-vulkan fi New Zealand jitla' għal 16