“Is-saħħa mentali tal-ħaddiem nħarsuha b’kundizzjonijiet tax-xogħol umani” - Josianne Cutajar

  • Ott 16, 2019 17:54
  • Miktub minn iNews
"

    Il-benesseri tal-ħaddiem tiġi qabel kull mudell ta’ tkabbir ekonomiku, u dan għaliex l-ekonomija għandha taħdem għas-soċjetà, u mhux bil-kontra.

    Dan enfasizzatu l-Membru Parlamentari Ewropew Dr Josianne Cutajar fl-intervent tagħha waqt laqgħa organizzata mill-MEP Alliance for Mental Health and the Global Alliance of Mental Illness Advocacy Networks.

    F’din il-laqgħa, li għaliha attendew ‘il fuq minn 120 rappreżentant ta’ organizzazzjonijiet u istituzzjonijiet fil-qasam tas-saħħa, Cutajar saħqet li l-impatt ta’ kampanji ta’ għarfien u edukazzjoni dwar is-saħħa mentali huma lkoll pożittivi, iżda mhux biżżejjed. 

    “Fuq kollox, il-perspettiva tal-ħidma tagħna trid tkun waħda wiesgħa u intersezzjonali, għaliex kull qasam soċjali jaffettwa s-saħħa mentali tagħna,” saħqet Dr Cutajar. F’dan is-sens, hija faħħret id-Direttiva dwar il-bilanċ bejn il-ħajja u x-xogħol approvata waqt l-aħħar leġiżlatura tal-Parlament Ewropew, għaliex din il-leġiżlazzjoni irrikonoxxiet il-bżonnijiet personali u familjari tal-ħaddiema. 

    Cutajar hawnhekk tkellmet ukoll dwar qasam ċentrali għall-ħidma tagħha fil-Parlament Ewropew: id-diġitalizzazzjoni u t-teknoloġija fil-post tax-xogħol. Filwaqt li dawn iwasslu għal xogħol iktar effiċjenti, produttiv, u dinamiku, Cutajar irrimarkat li dan għandu qabel xejn iwassal għal kundizzjonijiet tax-xogħol aħjar, mhux agħar.

    Fil-kuntest ta’ suq tax-xogħol li dejjem qiegħed jinbidel u jevolvi fl-hekk imsejħa gig economy, li bidlet il-mod ta’ kif ħaddiem jagħti xogħlu, rridu noqgħodu iktar attenti għal kif dan qiegħed jaffettwa lill-bniedem. 

    “Il-bidla jaf tkun pożittiva,” kompliet Cutajar, “iżda bħalissa, d-direttivi Ewropej mhumiex ikopru din ir-realtà ġdida, b’riskju li ċertu settur ta’ ħaddiema ma jkunux protetti mil-liġi.” 

    Il-Membru Parlamentari Ewropew saħqet ukoll li l-interazzjoni tagħna mat-teknoloġija, u l-iżvilupp tagħha, inkluż fil-qasam tas-sorveljanza u robotika, jridu jiġu studjati skont il-kapaċità tagħhom li jżidu s-sodisfazzjoni fuq il-post tax-xogħol.

    “Il-ħajja mhijix biss dwar gwadann ekonomiku, iżda jekk niżviluppaw il-leġiżlazzjoni u teknoloġija tagħna bilgħaqal, nistgħu nibnu soċjetà b’saħħitha li tistrieħ fuq l-innovazzjoni,” temmet Cutajar. 

    Simili

  • Agħżel storja li tixtieq tikkummenta dwarha u agħfas fuq il-ħolqa "ikkummenta" li tinsab taħt l-artiklu.

    Wara dan tinfetaħlek tieqa fejn tintalab tirreġistra. Agħfas fuq "irreġistra" u imla d-dettalji kif mitlub. Importanti li kull dettall imdaħħal ikun korrett. Minkejja li tintalab timla indirizz tal-imejl li huwa eżistenti u mhux fittizju, inti xorta tista' tikkummenta b'mod anonimu.

    Wara li tibgħat id-dettalji tiegħek, se tirċievi imejl fuq l-indirizz li rreġistrajt bih. F'din l-imejl se tirċievi security code.

    Ikkupjah u daħħlu fit-tieqa tar-reġistrazzjoni. Din hija proĊedura li ssir darba.

    Minn hemm 'il quddiem tkun tista' tikkummenta fuq kull artiklu bin-nom-de-plume tal-għaໝla tiegħek. Jekk issib xi diffikultà tiddejjaq xejn tikkuntattjana fuq 2590 0288.

Kummenti: 0

    0