Ftehm ta’ kollaborazzjoni bejn l-MFA u Frosinone Calcio

• Aww 29, 2018 00:35
• Miktub minn iNews

Il-Malta Football Association u Frosinone Calcio għadhom kemm iffirmaw ftehim ta’ tliet snin biex isaħħu l-kollaborazzjoni fis-settur taż-żgħażagħ.

Grazzi għal dan il-ftehim, bil-per­mess tal-ġenituri tagħhom, tal-club u anke bl-approvazzjoni tal-FIFA, kull sena żewġ players żgħażagħ Maltin jistgħu jingħaqdu mal-iskwadra tal-Youths ta’ Frosinone Calcio filwaqt li żewġ coaches miċ-Ċentru Tekniku tal-MFA jistgħu wkoll jiksbu esperjenza fi ħdan is-settur taż-żgħażagħ ma’ dan il-club Taljan.

“Ninsabu sodisfatti ferm li kkon­kludejna l-iffirmar ta’ dan il-ftehim ma’ Frosinone Calcio,” qal il-president tal-MFA, Norman Darmanin Demajo.

“Din is-sħubija tikkumplimenta l-politika tagħna biex jinħolqu opportunitajiet ġodda għall-players żgħażagħ tagħna biex jitħarrġu u jilagħbu f’ambjent professjonali, bi ftehim mal-club lokali tagħhom.

“Aħna fiduċjużi li dawn l-opportunitajiet jistgħu jservu ta’ benefiċċju kbir għall-iżvilupp tat-talenti tagħhom.

“Il-qasam tal-coaching education huwa wkoll prijoritá għall-MFA u dan il-ftehim se jagħti ċ-ċans lill-coaches fis-settur tal-Youths biex itej­bu u jkabbru l-għarfien tagħ­hom u jiksbu l-esperjenza kollha meħtieġa billi jkunu mħarrġa u jaħdmu f’ambjent professjonali barra minn xtutna.

“Għaldaqstant irrid nirringrazzja lil Frosinone Calcio għall-assistenza u l-koperazzjoni tagħhom, b’mod speċjali lis-Sur Ernesto Salvini, li huwa responsabbli mis-settur tekniku tal-club Taljan, kif ukoll lis-Sur Mauro Di Lello,” temm jgħid il-president tal-MFA.

Min-naħa tiegħu, Ernesto Salvini esprima s-sodisfazzjon tiegħu għal dan il-ftehim ta’ kollaborazzjoni u sostna li jittama li permezz ta’ din is-sħubija jinkisbu riżultati importanti fil-futur. 

Sadanittant Jake Engerer, membru tat-team nazzjonali Malti ta’ taħt is-17-il sena, diġà beda t-taħriġ tiegħu mal-iskwadra tal-Youths ta’ Frosinone Calcio, filwaqt li Nikolai Farrugia Cross ta’ Birkirkara huwa fil-proċess li jingħaqad mas-settur tal-Youths tal-club tas-Serie A Taljana fil-futur qrib.

Kemm Engerer kif ukoll Farrugia Cross għamlu żjara fiċ-ċentru tat-taħriġ ta’ Frosinone fil-ġimgħat li għaddew.

L-appoġġ u l-koperazzjoni tal-ġenituri ta’ dawn iż-żewġ players, kif ukoll ta’ Birkirkara FC fil-każ ta’ Far­rugia Cross, kienu fundamentali fid-diskussjonijiet ma’ Frosinone Calcio.

 

Simili

• 

  Ever Banega fil-mira ta’ Arsenal

• 

  David Luiz jinsab qrib li jiffirma estensjoni ma’ Chelsea

• 

  Sergio Aguero jġedded il-kuntratt ma’ Manchester City