L-erba' persuni li niżlu fil-grawnd jagħmlu parti minn grupp ta' protesta

Lul 15, 2018 19:58
Miktub minn iNews

Il-persuni li daħlu fil-grawnd waqt il-logħba li ntlagħbet aktar tard il-lejla bejn Franza u l-Kroazja huma erba’ membri ta’ grupp Russu.Huma rnexxielhom jiżgiċċaw minn fost il-membri tas-sigurtà biex fit-52 minuta, tnejn minnhom irnexxielhom saħansitra jaslu sa nofs il-grawnd.

Il-grupp mhux l-ewwel darba li kkritika lill-President Russu Vladimir Putin li kien preżenti meta aktar kmieni l-pulizija intervjenew biex tkun tista’ tkompli l-logħba tant mistennija. Id-difensur Kroat Dejan Lovren għen biex wieħed mill-erba’ persuni jiġi miżmum mill-pulizija. Persuna oħra irnexxielha tasal sa nofs il-grawnd u saħansitra tagħmel ġest bl-idejn mal-attakkant Franċiż Kylian Mbappe li sa ftit sekondi qabel ra lill-gowler Kroat iwaqqfu milli jżid l-iskor.

Waħda mill-protestanti kienet rrapurtata bħala l-magħrufa Nadezhda Tolokonnikova, tfajla ta’ 28 sena li fl-2012 kienet arrestata minħabba mġieba mhux aċċettata fil-Katidral ta’ Moska. Fost it-talbiet tal-grupp kien hemm il-ħelsien tal-politiċi ħabsin u biex jieqfu l-arresti illegali waqt id-dimostrazzjonijiet. Huma talbu wkoll tmiem għall-fabrikazzjoni ta’ każijiet kriminali u arresti ta’ protestanti.