San Filippu Neri… l-ewwel kien se joħroġ u mbagħad bidlu d-deċiżjoni

Lul 03, 2018 19:49
Miktub minn iNews

Fil-Qrendi inħolqot kwistjoni marbuta mal-istatwa ta’ San Filippu Neri. Dan minħabba l-fatt li kienet ix-xewqa tal-konfraternità tal-Madonna ta’ Lourdes li l-istatwa toħroġ f’puriċissjoni mal-Madonna ta’ Lourdes fil-festa tagħha. Jidher li l-kappilla kien ta l-approvazzjoni imma imbagħad il-Kurja dawret id-deċiżjoni u ma’ aċċettatx li din tinħareġ. Din id-deċiżjoni qajmet rabja fost il-partitarji tal-festa ta’ Lourdes li ma jistgħux jifhmu kif l-awtoritajiet ekkleżjastiċi waslu għal din id-deċiżjoni. Huma qed jistaqsu jekk il-Kurja hix timxi ma’ kulħadd l-istess.

Il-Konfraternità Lourdes f’kummenti qalet b’mod ċar li “wara li saret talba sabiex l-istatwa ta’ San Filippu Neri toħroġ proċessjonalment mal-Madonna ta` Lourdes f`nhar il-festa u ngħata permess mill-Kappillan, il-Kurja u l-Kappillan reġgħu lura d-deċiżjoni u għalhekk il-Konfraternità ma ngħatatx permess. Hija verament deċiżjoni inġusta speċjalment meta tara li f’parroċċi ohra permessi simili ħargu mingħajr problemi. Bħala Konfraternità saqsejna għalfejn dawn it-tip ta’ deċiżjonijiet jittieħdu fir-rigward tal-Konfraternità tagħna pero sa` llum bqajna mingħajr risposta. Bħala Konfraternità se inkomplu naħdmu, ser nieħdu ħsieb l-istatwa u l-pedestall ta’ San Filippu Neri li jinsabu f’kundizjoni ħażina ħafna. Nafu li dan mhux atteġġjament ġust speċjalment meta qegħdin niċċelebraw żewġ anniversarji importanti u nisperaw li l-awtoritajiet qegħdin ikunu ġusti ma` kullħadd.”