Se jibda r-restawr fuq l-Għajn ta' Għeriexem fir-Rabat

• Lul 25, 2012 11:21
• Miktub minn

Fil-jiem li ġejjin se jibda x-xogħol fuq l-'Għajn ta' Għeriexem' fir-Rabat, għajn mill-isbaħ u li sa llum għadu ġej l-ilma ġieri fiha, għalkemm inqas minn dak li kien jinżel fiha snin ilu.

Anzjan li lbieraħ tkellem ma' inewsmalta.com, qalilna li "l-proċess biex tiġi restawrata ilu għaddej. L-għajn sofriet ħsarat għax kienu jiġu nies jieħdu l-ilma minnha. Ġieli ġew bil-vannijiet. Ilha wkoll snin mitluqa. Nittamaw li din iż-żona pjuttost mitluqa tiġi rranġata u l-għajn tingħata d-dehra li jixraqilha. Niġbed l-attenzjoni għal kolonna Rumana li hemm fiha, kolonna li minn dak li jingħad fis-seklu 19 kien għad fadal sew minnhom u li llum kważi kollha sparixxew u nqerdu".

Is-Sindku tar-Rabat Sandro Craus qal li l-Kunsill irnexxielu jikseb fondi biex jirrestawra "din l-għajn li tant għandha storja."

"Ilna għaddejin bi studji serji għal dawn l-aħħar sentejn fejn anke għamilna applikazzjoni mal-Mepa. Lestejna Restoration Method Statement flimkien ma' applikazzjoni serja biex nirranġaw il-ħsarat li din l-għajn ġarbet matul is-snin. Il-permessi tal-Mepa qegħdin għandna u fil-jiem li ġejjin se jibda x-xogħol," qal Sandro Craus li kellu kliem ta' grazzi għall-Volks Bank li ta għajnuna finanzjarja u l-Perit Daniel Micallef li qiegħed jieħu ħsieb l-aspett tekniku.

Simili