Il-Mexxejja fl-aħħar dibattitu tal-kampanja elettorali

  • Mar 06, 2013 20:45
  • Miktub minn
"

    Il-Kap Nazzjonalista Lawrence Gonzi u l-Mexxej Laburista Joseph Muscat illejla ffaċċjaw lil xulxin f’dibattitu ta’ siegħa fuq l-istazzjon nazzjonali fejn Muscat ffoka ħafna mill-interventi tiegħu fuq il-pjan tal-enerġija tal-Partit Laburista waqt li Gonzi qal li pajjiżna mgħandux bżonn pjan għax diġà hemm soluzzjonijiet maħsubin.

    F’dan dibattitu, l-aħħar wieħed f’din il-kampanja elettorali, il-Kap Nazzjonalista kkritika l-pjan tal-enerġija tal-PL għax qal li dan se jkollu żewg tankjiet tal-gass daqs il-knisja tal-Mosta f’nofs il-powersation. Qal li din mgħandniex bżonnha għax hemm soluzzjonijiet diġà maħsubin bl-interconnector biex inġibu n-night tariff li qal li biha se jgawdu l-fabbriki li jaħdmu bix-xift ta’ bil-lejl. Qal li hu baħri tal-maltemp u mhux baħri tar-roadmaps li ma jfissru xejn. Fl-istess waqt qal li kieku kellu jferrex il-flus li ġiebna mill-UE fuq id-desk li kienu miegħu, ma kinux joqogħdu.

    Il-Mexxej Laburista rribatta b’qawwa għal dawn id-dikjarazzjonijiet u sostna li l-fatt li PM qed jiddikjara li mgħandniex bżonn ta’ pjan għall-enerġija, ifisser li għal Gonzi mhemmx bżonn li jorħsu l-kontijiet tad-dawl u l-ilma, b’Gonzi ma jweġibx għal din l-istqarrija. “Din hi konferma li l-unika ċertezza li hemm biex jorħsu l-kontijiet għall-familji u n-negozji huwa l-PL,” qal Muscat.

    Dwar il-fondi mill-UE, Muscat qal li l-punt hu kif se tonfoqhom. Qal li jekk pajjiżna ngħata €1,100 miljun mill-Ewropa, f’sentejn u nofs se nkunu qed nonfqu l-istess ammont f’żejt kuljum. Huwa saħaq li pajjiżna mgħandux jibqa’ dipendenti fuq iż–żejt, iżda għandna naqilbu għall-gass biex mhux biss ikollna traħħis fil-kontijiet iżda ambjent aħjar u fejn il-flus jintużaw aħjar.

    F’intervent ieħor Muscat qal li l-PM huwa maqtugħ mir-realtà. Waqt li rrikonoxxa s-suċċessi li kien hemm f’numru ta’ oqsma, qal li teżisti problema ta’ xogħol prekarju, ta’ nies li qegħdin fuq l-għatba tal-faqar u middle class li qed tiżloq lura fil-livell tal-għajxien.

    Waqt li l-Kap Nazzjonalista tenna għal bosta drabi li pajjiżna għandu fost l-inqas rata ta’ qgħad fl-Ewropa, Muscat semma kif fl-aħħar erba’ snin u nofs, is-saħħa tal-pagi fl-Ewropa żdiedet bi €13-il fil-ġimgħa waqt li f’Malta naqset bi €8 fil-ġimgħa. “Din mhix statistika li ħoloq il-PM dwar il-ħolqien tal-impjiegi li ma ssibha mkien, iżda statistika tal-UE,” qal Muscat waqt li fakkar li l-ekonomija ta’ pajjiżna kellha żewg downgrades mill-agenziji tal-kreditu u sitwazzjoni fejn il-PM ma jridx jammetti li l-qgħad żdied għal 11-il xahar konsekttuiv u fejn hemm mal-4,600 żagħżugħ/a jfittxu mhux attivi fis-suq tax-xogħol.

    Il-Mexxej Laburista qal li l-PL qed ikun responsabbli fil-pjani tiegħu u mhux iwiegħed kollox kif qed jagħmel il-PM. Qal li Gonzi qed jgħid l-istess affarijiet li qal u wiegħed ħames snin ilu billi jgħid li ra l-maltemp, imbagħad waqt li ma jżommx kelmtu u jisplodi l-kontijiet, jagħti żieda lilu nnifsu u lill-ministri tiegħu ta’ €500 fil-ġimgħa.

    Wara li f’din il-kampanja elettorali Gonzi stqarr li l-Laburisti jħammrulna wiċċna u n-Nazzjonalisti jagħmluna kburin, il-PM qal illejla li jaf x’kapaċi jagħmlu l-Maltin… “mhux kuluri ta, mhux kwistjoni ta’ Nazzjonalisti u Laburisti, iżda kemm huma kapaċi jibbrillaw fuq ħaddieħor”.

    Fl-għeluq tad-dibattitu Gonzi qal li s-Sibt li ġej meta se mmorru nivvotaw se jkollna karta quddiemna, lista b’kandidat tal-PN u tal-PL. Qal li hemm se jkunu bl-aħmar u l-blu… “ma nistgħux naħarbu minnha, qed jaqsmuna dawn iż-żewġ kuluri, l-aħmar huwa aħmar, il-blu huwa l-blu,” kompla Gonzi. Huwa qal ukoll li perfetti mhumiex u li dejjem ipprovaw ikunu fuq in-naħa t-tajba tal-istorja. Hekk qal li għamlu fil-ħames snin li għaddew, u hekk se jagħmlu fil-ħames snin li ġejjin.

    Min-naħa tiegħu Muscat qal li Gvern Ġdid se jkun differenti għax mhux se jħares lejn l-uċuħ iżda x’isarrfu n-nies, gvern li mhux li jieħu l-mertu ta’ ħaddieħor u jfarfar it-tortijiet, li jwiegħed ħafna u ma jwettaqx… se nkunu gvern ta’ kulħadd u mhux tal-klikka, gvern li ma jieħux €500 fil-ġimgħa meta l-poplu qed iħallas l-ogħla kontijiet tad-dawl u l-ilma,” sostna l-Mexxej Laburista.

    Waqt li sostna li hu jemmen lil dawk li se jivvotaw għall-ewwel darba lill-PL, qal li jinsab lest biex jaqleb totalment il-folja wara li l-PL inbidel f’moviment u issa qed joffri pjan ċar fejn lesti li jaħmdu ma’ kulħadd anke ma’ dawk li ma jaqblux miegħu.

    Ritratti: Ray Attard

    Simili

  • Agħżel storja li tixtieq tikkummenta dwarha u agħfas fuq il-ħolqa "ikkummenta" li tinsab taħt l-artiklu.

    Wara dan tinfetaħlek tieqa fejn tintalab tirreġistra. Agħfas fuq "irreġistra" u imla d-dettalji kif mitlub. Importanti li kull dettall imdaħħal ikun korrett. Minkejja li tintalab timla indirizz tal-imejl li huwa eżistenti u mhux fittizju, inti xorta tista' tikkummenta b'mod anonimu.

    Wara li tibgħat id-dettalji tiegħek, se tirċievi imejl fuq l-indirizz li rreġistrajt bih. F'din l-imejl se tirċievi security code.

    Ikkupjah u daħħlu fit-tieqa tar-reġistrazzjoni. Din hija proĊedura li ssir darba.

    Minn hemm 'il quddiem tkun tista' tikkummenta fuq kull artiklu bin-nom-de-plume tal-għaໝla tiegħek. Jekk issib xi diffikultà tiddejjaq xejn tikkuntattjana fuq 2590 0288.

Kummenti: 0

    18