'Nippreferi nagħmel suwiċidju milli niġi paralizzat'

Apr 04, 2016 00:39
Miktub minn Gaetano Micallef

Joe Magro għandu 56 sena, u għaxar xhur ilu t-tobba tawh l-aħbar ħażina li qed ibati bil-‘motor neurone disease’, marda li taffettwa n-nervituri sal-punt li ġġibek paralizzat.

Konxju li jekk ma tinstabx kura għad jispiċċa paralizzat, Magro ħareġ jappella lill-awtoritajiet lokali biex idaħħlu l-ewtanasja ħalli jkun jista’ jtemm ħajtu flok jispiċċa jgħix dipendenti fuq ħaddieħor.

Permezz ta’ inewsmalta, il-missier ta’ erbat itfal qed jerġa’ jagħmel dan l-appell lill-politiċi, anke għall-fatt li fil-preżent jekk persuna tgħin lil oħra biex ittemm ħajjitha biex ma tibqax tbati, tiġi meqjusa f’għajnejn il-liġi daqslikieku tkun qatlitha.

Magro huwa rassenjat li jekk l-ewtanasja ma tidħolx f’pajjiżna u l-kundizzjoni tiegħu tibqa’ tiddeterjora, mhux se jibqalu triq oħra ħlief li jwettaq suwiċidju.

Għalkemm jemmen li l-maġġoranza tal-poplu taqbel li tidħol l-ewtanasja, Magro ma jridx li jsir referendum għax jemmen li dan għandu jkun dritt tal-individwu u li ebda persuna oħra m’għandi tiddeċiedi għal oħra.

Aqra l-intervista sħiħa ma' Joe Magro f'L-ORIZZONT tal-lum.