Grieg u Russa jirbħu l-Finali tas-Singles

• Lul 11, 2012 16:57
• Miktub minn

Sittin plejer żgħir minn 13-il pajjiż Ewropew ħadu sehem fil-VLTC Kettle Chips European Junior Tournament li ġie organizzat mill-Vittoriosa Lawn Tennis Club b’kollaborazzjoni mal-Federazzjoni Maltija tat-Tennis.

It-turnament intlaghab bejn it-2 u s-7 ta’ Lulju u kien ta’ Kategorija 3 fil-Kalendarju tat-Tennis Europe ta’ taħt l-14-il sena.

Il-kompetizzjoni kienet karatterizzata minn livell tabilħaqq għoli u pjaċevoli ta’ tennis b’kontingent qawwi ta’ plejers Russi jħallu impressjoni tajba meta rebħu l-parti l-kbira tal-unuri. Sadanittant it-turnament ukoll serva ta’ esperjenza tajba għat-tennisti żgħar Maltin fejn setgħu jikkompetu kontra plejers Ewropew b’ħiliet tassew impressjonanti. Fost il-Maltin, Katrina Sammut irnexxielha tilħaq sal-kwarti-finali tas-singles meta għelbet lil Tatsiana Burdyka tar-Russja f’logħba mill-isbaħ iżda mbagħad tilfet mat-‘top seed’ Ekaterina Korzhova tar-Russia.

Is-singles tas-subien kienet bejn Vasileios Iliopoulos tal-Greċja u Finn Bass tal-Gran Brittannia. Din il-finali kienet wirja mill-isbaħ ta’ kif għandha tkun il-logħba – sahha fl-istroke imżewqa b’finezza fil-volley. Iż-żewg plejers lagħbu logħob eċċezzjonali, bil-Grieg jirbaħ bl-iskor ta’ 6-4, 6-3.

Fis-singles tal-bniet, li ntlaghbet fl-Atlas Insurance Court tal-VLTC, Kristina Kamskaya tar-Russja iltaqgħet mal-kompatrijotta taghha Ekaterina Korzhova f’logħba eċċitanti kkaratterizzata bi ground strokes miż-żewg naħat. Kristina baqgħet konsistenti biex rebħet bl-iskor ta’ 6-4, 6-4.

L-unuri għad-doubles tas-subien intrebħu minn Salvador Bandeira tal-Portugall u Alvaro Regalado ta’ Spanja li għelbu lit-tandem Russu Timiur Igamberdyev / Nikita Potatov 6-1, 6-3.

Id-doubles tal-bniet kienet kollha kemm hi Russa, fejn Kristina Kamskaya u Ekaterina Korzhova għelbu lill-kompatrijotti taghħom Varvara Kuksina u Maria Smoylar 6-3, 6-3. Id-duo Maltin Katrina Sammut u Rebecca McCarthy laħqu s-semi-finali iżda hawn tilfu mat-‘top seeds’ u eventwalment ir-rebbieħa Kristina Kamskaya u Ekaterina Korzhova 6-2, 6-2.

Fl-aħħar tal-logħob, Twanny Camilleri, Segretarju tal-VLTC qassam it-trofej lir-rebbieħa u ‘runners-up’. Preżenti wkoll kien hemm Francis Sciberras, Direttur tal-European Tournaments tal-VLTC. L-organizzaturi rringrazzjaw lil Carlos Cluett, rappreżentant tal-Kettle Chips f’Malta, l-isponsors tat-turnament, kif ukoll lil Farsons li pprovdew l-ilma San Michel lill-plejers matul il-ġimgħa tal-kompetizzjoni.

Simili

• 

  Filmat: Tazza Afrikana: it-Tielet post: Tuneżija v Niġerja 0-1

• 

  Filmat: Arsenal v Bayern Munich 2-1

• 

  Juventus jikkonfermaw l-ingaġġ ta’ Matthijs de Ligt